LAOAG CITY – Napaltugan dagiti dua a lallaki a nakalugan ti kurung-kurong babaen kadagiti dua a naglubbon ti motorsiklo iti paset ti Sitio Burdo, Barangay Lagui-Sail ditoy ciudad ti Laoag.
Nabigbig dagiti biktima a da Wilmer Domingo, ken ni Robin Bordado, agpada dagitoy a taga Barangay 29 ditoy ciudad ti Laoag.
Naitaray dagiti biktima iti Governor Roque Ablan Senior Memorial Hospital (GRASMH) ditoy ciudad ti Laoag, ken iti agdama ket adda dan ti natalged a kasasaad.
Iti inisyal nga imbestigasyon, kabayatan ti panagpapa-abagatan a direksyon dagiti biktima manipod idiay ili ti Vintar ket kellaat lattan a pinaltu-paltugan ida dagiti suspek.
Segun ken ni Police Major Artemio Clemente, ti chief iti Intel ken Investigation iti PNP ditoy ciudad ti Laoag, maysa a kalibre 45 a paltog ti nausar.
Innayon na a Domingo ket natamaan ti barukong na idinto a ni Bordado ket nasugatan met ti bagi ken saka na.
Kinumpirmaran ni Clemente a ti maysa kadagiti biktima ket adda dagiti kaso na kas ti parricide gapu ti maipagarop a panangpapatay na ti asawa na idi 2012, kaso na a pammagkong, panagtatakaw, ken dadduma pay.
Kuna na nga agtultuloy ti imbestigasyon da tapno mabigbig ti kinatao dagiti suspek ken no ania ti motibo iti napasamak a pammaltog.
