LAOAG CITY – Agpada a pimmusay dagiti dua a lallaki a nakalugan ti motorsiklo kalpasan a nadegsrasya da iti paset ti Barangay Poblacion 4,Pasuquin, Ilocos Norte iti oras ti alas-11:20 idi rabii.
Nabigbig dagiti biktima nga isuda Mark Gregory Villa, agtawen ti 24, baro, driver ti motorsiklo taga Barangay Naglicuan iti ili ti Pasuquin ken ti inlubbon na a ni Gerald Dominic Isaac, agtawen ti 30, ken residente iti Barangay Poblacion 2 iti met laeng nasao nga ili.
Iti eksklusibo nga interview ti Bombo Radyo Laoag ken ni Police Chief master Sergeant Roel Silvestre, ti chief investigator iti ili ti Pasuquin, kabayatan ti panagpapa-amyanan a direksyon dagiti biktima ket naidungpar da iti concrete beam iti akin-kannawan a paset ti kalsada.
Inbatad na nga iti imbestigasyon da ket naigid unay dagiti biktima ken possible a nataray unay ti motorsiklo isut gapuna a nadiskarkulo ti driver.
Innayon ni Silvestre nga adda dagiti kakadwa dagiti biktima ngem adayo da kadakuada, ken saan dan a nadamag no naggapoan dagiti maseknan.
Naitaray dagiti biktima iti Governor Roque Ablan Senior Memorial Hospital (GRASMH) ditoy ciudad ti Laoag ngem agpada da a naideklara a dead on arrival gapu kadagiti sinagaba da a nakana a sugat iti nagduduma a paset ti bagida.
