LAOAG CITY – Naikkan dagiti dua a lallaki ti citation ticket ditoy ciudad ti Laoag kalpasan a saan da a nakasuot ti face mask kabayatan nga adda da iti ruwar wenno pampubliko a lugar.
Binigbig ni Police Senior Master Sergeant Eric Bumagat dagitoy a da Carlo Salvador Bartolome, agtawen ti 39, awanan asawa ken residente ti Brgy. 31, Talingaan ditoy ciudad ti Laoag ken Harry Francis Zeta Madolora, agtawen ti 74, balo ken residente ti Brgy. 20, Basa St. ditoy ciudad.
Inbatadn a a natiliw ni Bartolome iti paset ti JP Rizal St. partikular iti sangoanan ti dakkel a grocery store a sakupen ti Brgy. 10 ditoy ciudad.
Basar iti imbestigasyon, kunana nga agarup alas onse idi bigat kalman ken kabayatan ti foot patrol ken Oplan Sita da Police Staff Sergeant Rabang ken Police Staff Sergeant Canonizado ket nakita da ni Bartolome a magmagna nga agpadaya a direksyon a saan a nakasuot ti face mask ken agarup ala una iti malem, natiliw met ni Madolora iti paset ti Ligot St. iti sangoanan ti Park Hunter Gun Store a sakupen iti Brgy. 13 ditoy ciudad.
Inbatad ni Bumagat a kabayatan nga adda da Police Lieutenant Medina ken Patrolman Acacio iti pagbanbantayan da a lugar ket ditoy a nakita da ni Madolora a nakalugan ti motorsiklo na iti sakupen ti JP Rizal St. partikular iti sangoanan ti maysa pay a dakkel a grocery store nga awanan ti face mask.
Inlawlawag na nga idi sinita dagiti kameng ti pulisia dagiti residente no apay awan ti suot da a face mask ket awan ti naipakita da kadagiti otoridad.
Naamoan a dagiti natiliwan a saan a nakasuot ti face mask ket nagsalungasing iti Executive Order 67-2020 wenno ti Mandatory Wearing of Face Mask ken agmulta dagitoy ti lima ribu a pisos.
Maipalagip nga Abril 1 idi naparuk-atan ti pammilin ni Gov. Matthew Marcos seknan iti panagusar ti face mask idinto nga Abril 24 a naaprobaran iti opisina ti Gobernador ti ordinansa a panagmulta ti saan nga agusar ti face mask ngem ita laeng a lawas, nagbalin nga epektibo nga agmulta dagiti agsalungasing iti paglintegan gapu ta warning stage pay laeng kadagiti naglabas a lawas.
