LAOAG CITY – Kinumpirmaran ni PLt. Jimmy Aganon, ti deputy chief of police iti PNP-Batac ti napasamak a degrasya iti bisinidad ti Washington St. iti Brgy. Billoca iti siudad ti Batac.
Segun ken ni Aganon, tallo a lugan dagiti karaman iti nasao nga insidente.
Inbatad na a basar iti inisyal a panagimbestigarda, maysa a Kia Sedona nga inturong ti taga Brgy. Valdez iti nasao a siudad ti naggapo iti Brgy. Cangrunaan.
Kuna na a bayat a sumrek ti Kia iti bisinidad ti Washington St., dita a nakasinnabat na ti raider a motorisklo a nagluganan dagiti dua a lalaki ken naggapo iti sentro ti siudad.
Gapu iti daytoy, inbatad na a nadungpar ti motorsiklo ti akin-kannawan a paset ti sango ti Kia ken kalpasan na ket nadalapos na pay a nadungpar ti nakaparada a tricyle agingga a naipan iti sangoanan ti maysa a pagatengan.
Inpakaamo ni Aganon a nagtukkol ti akinkannigid a saka ti nangiturong ti motorsiklo idinto a ti akinkannawan a saka met ti natukklo iti lubbon na.
Kabayatanna, kuna na a saan a naan-ano ti nangiturong ti Kia ken inbaga na a maiyur-uray metten ti resulta ti liqour test dagiti biktima tapno maamoan no addaan dagitoy iti impluwensya ti nasanger.
Innayun na nga awan pay ti napagsasaritaan iti dua a partido seknan kadagiti magasto iti ospital ken iti nadadael a parte ti Kia.
