LAOAG CITY – Dagus a pimmusay dagiti dua a lallaki kalpasan ti pannakadesgrasya da iti Batac-Paoay road, bisinidad ti Barangay Quiling Sur iti nasao a ciudad ti Batac.
Binigbig ni Police Lt. Col. Mar Louise Bondoc, ti chief of police iti ciudad ti Batac dagiti biktima nga isuda Emmanuel Sadian, agtawen ti 25, driver ti motorsiklo ken ti kinalubbon na a ni Christian Dave Pacubat, agtawen ti 22, agpada a residente iti Barangay Salbang iti ili ti Paoay.
Iti inisyal nga imbestigasyon, kuna ni Bondo nga idi rabii ket naginom dagiti biktima ken iti agarop alas-dyes ket nagturong da iti maysa a paggi-inuma iti ciudad ti Batac.
Inbatad na nga agawid kuman dagiti biktima ngem gapo iti kapaspas ti taray ti motorsiklo da ket naawanan ti control ti driver iti manibela rason a naidungpar da iti gate ti maysa a dormitoryo ken pavement post.
Inlawlawag na nga arig na awan ti nagbalbalinan ti bagi dagiti biktima a rason ti dagus a pannakatay da.
Naamoan nga awan ti suot dagiti biktima nga helmet bayat ti panagmotorsiklo da.
