LAOAG CITY – Dua nga indibidual ti napan nangisuko ti paltog na iti Philippine National Police (PNP) iti ciudad ti Batac.
Daytoy ti inbatad ni Police Lt. Col. Adrian Gayuchan, ti chief of police iti nasao a ciudad.
Segun ken ni Gayuchan, immuna a nagturong iti opisina da ti Retired Agriculturist, agtawen ti 65 ken residente iti Barangay Valdez iti ciudad ti Batac tapno isuko na ti paltog na a 12 gauge shotgun.
Kuna ni Gayuchan a nag-expired ti lisensya ti paltog ti retired agriculturist idi Abril 2016.
Kalpasan iti daytoy ket nagturong met ti maysa a welder, agtawen ti 35, naasawaan ken residente iti Barangay Billoca iti ciudad ti Batac tapno isuko na ti paltog na a kalibre 45 ken addaan ti magazine a nag-expired paylaeng ti lisensya na idi Enero 2014.
Inpakaammo ni Gayuchan nga agpada dagiti maseknan a saanen nga interesado a mangala ti paltog da nga inpasidong da iti Philippine National Police.
Innayon na a resulta daytoy ti naiget a panangiyus-uswat da ti Oplan-Katok kadagiti nagduduma a barangay iti ciudad ti Batac.
Kabayatanna, ginutigot ni Gayuchan dagiti agik-ikot ti expired ti lisensya na a paltog a mapan da paylaeng ipadulin iti Philippine National Police tapno saan da a maoperasyunan.
