LAOAG CITY – Dua ti naarestar idinto a lima a sabsabali dagiti nakalibas iti naisayangkat nga illegal gambling operation iti balay ni Rodel Andres iti Sitio 3, Barangay Bacsil-South ditoy ciudad ti Laoag.
Nabigbig dagiti naarestar nga isuda Max Donald Nagasao Mateo, agtawen 28, baro, mannalon ken ni Hilando Rafael Andres, 50, naasawaan, agpada dagitoy a residente iti nadakamat a barangay.
Kabayatanna, nakalibas met dagiti lima pay a suspek a pakairamanan ni Mr. Tristan Agcaoili, taga Barangay 7-A ditoy ciudad.
Nakumpiskar dagiti otoridad iti lugar ti maysa a mono bloc a lamisaan, 5 a mono block a tugaw, maysa a mono block nga atiddog a lamisaan, 53 a pedaso ti baraha, P1,860 a kwarta a maipagarop a pusta dagiti suspek, ken ti tallo a motorsiklo.
Kabayatanna, inpasingked ni Mateo a saan a nakisugal no di ket napan laeng naginom iti ayan dagiti nasusugal.
