LAOAG CITY -Nagsagaba ti sugat iti nagduduma a paset ti dua a lallaki kalpasan ti napasamak a desgrasya iti Airport road paset ti Barangay Bengcag ditoy ciudad ti Laoag.
Iti imbestigasyon ti PNP-Laoag, agpada nga agpadpadaya ti motorsiklo nga inturong ti agtawen ti 31, residente iti Barangay Magnuang iti ciudad ti Batac ken ti tricycle nga inturong met ti agtawen ti 44, residente iti Barangay Navotas-A ditoy ciudad ti Laoag.
Nupay kasta, kabayatan ti panagdaldalyasat ti dua a behikulo ket bigla a nagmenor ti motorsiklo ken saan a napakadaan ti tricycle a nangitunda ti napasamak a desgrasya.
Gapu iti daytoy, nagsagaba ti sugat iti nagduduma a paset ti bagi dagiti dua a driver ken naitaray da iti Governor Roque Ablan Senior Memorial Hospital (GRASMH) ditoy ciudad ti Laoag para iti naan-anay a pannakataming da.
Rumrumuar iti imbestigasyon a nakainom ti arak ti Tricycle driver.
