LAOAG CITY – Nagsagaba iti nagduduma a sugat dagiti agkasinsin kalpasan a binagkong a mismo ti kasinsin da iti paset ti Barangay #14 Bungon, Batac City, Ilocos Norte.
Nabigbig dagiti biktima nga isuda Eugenio Quicquic Jr. y Daquep, agtawen ti 45, tricycle driver ken ni Dionisio Bagaoisan Jr. y Daquep, naasawaan, agtawen ti 43, laborer idinto a ti suspek ket ni Kenneth Corpuz y Daquep, naasawaan, agtawen ti 37, tricycle driver, ken agpapada dagitoy a residente iti nasao a barangay.
Iti imbestigasyon dagiti kameng ti PNP-Batac, naggi-inom dagiti biktima ken ti suspek idi naaddaan ti nabara a panagsinnungbat ni Corpuz ken Quicquic.
Gapo iti daytoy, nakapungtot ni Corpuz isut gapo na a simrek iti balay da ken idi rimwar ket addan ti iggem na a kutsilyo ken dagus na a binagkong ni Quicquic iti namin-ado a daras partikular iti buksit na.
Naamoan a naganawa ni Bagaoisan ngem inraman ni Corpuz a binagkong ti akin-kannawan a luppo na.
Dagus met a nagtaray ti suspek idinto a ni Bagaoisan ket napan nagpatulong iti asawa na rason a naitaray dagiti biktima iti Mariano Marcos Memorial Hospital and Medical Center iti nasao a ciudad.
Kalpasan daytoy ket naiwayat ti hot pursuit operation ken naarestar ti suspek iti uneg ti pagtaengan na ngem saan pay a narekobre ti kutsilyo a nausar iti pammagkong.
Iti agdama ket agtultuloy pay laeng ti imbestigasyon iti daytoy a pasamak tapno maamoan no anya ti pudno a motibo ti nasao a pammagkong.
