LAOAG CITY – Nasugatagan dagiti dua a lallaki kalpasan ti pannakadesgrasya da iti Barangay 1 ditoy ciudad ti Laoag.
Segun kenni Police Lt. Col. Rafael Lero, ti chief of police ti PNP-Laoag, dagiti dua nga indibidual ket agtawen ti 18 ken 16, ken agtrabtrabaho da iti maysa a kompanya ti softdrinks.
Kinumpirmaran na a positibo a nakainom dagiti biktima ti nasanger idi napasamak ti insidente.
Kunana nga agtultuloy pay laeng ti panangala da ti impormasyon gapo ta idi rabii kalpasan ti pannakataming da ket nakaturogen dagiti biktima.
Karaman kadagiti duktalen da ket no naggapoan wenno pagturungan dagiti biktima iti dis-oras iti rabii.
Mainaig iti daytoy, kunana a maikkan ti citation ticket dagiti dua gapo iti panaglabsing da iti curfew hours, nagmaneho nga awan ti lisensya ken helmet ken nakainom pay dagitoy.
Kabayatanna, kuna ni Lero a mapaayaban met ti nagannak ti menor de edad a biktima ken dumalan dagitoy iti seminar mainaig iti panangtaripato kadagiti annak kangrunaan iti menor de edad.
