LAOAG CITY – Nagsagaba ti sugat iti ulo dagiti dua a lallaki kalpasan ti napasamak a panagtagbat iti Brgy. 21, Libtong iti ili ti Bacarra.
Inbatad ni PMaj,. Arnel Tabaog, ti hepe iti PNP-Bacarra a basar iti panagimbestigar da, aggin-inom da Marvin Cabreros y Ruiz, agtawen ti 32, naasawaan, hog raiser kenni Sherwin Guadana y Saguibo, agtawen ti 36, single ken maysa a construction worker iti sango ti pangtaengan ti suspek a ni Jovencio Magarin y Padre Jr, agtawen ti 36, addaan ti live-in partner, mannalon ken agpapada dagitoy a residente iti nasao a barangay.
Kuna na a dita a kellaat a nagpukka-pukkaw ti suspek ken napan met kinompromtar ni Cabreros kenni Guadana.
Nu pay kasta, imbes a maanawa ni Magarin ket nagriri dagitoy agingga a tinagbat ti suspek dagiti dua partikular iti ulo ni Cabreros ken iti me ti likod ti lapayag ni Guadana.
Dagus a naitaray dagiti biktima iti Laoag City General Hospital (LCGH) para pannakataming da.
Kabayatanna, dagus met a naarestar ti suspek ken nagtalinaed ti kustodyar ti PNP-Bacarra para iti umno a disposition.
Rumrumuar a ti motibo ti insidente ket dati a riri iti nagbaetan ti suspek ken dagiti biktima.
