Natay ti dua a lallaki kalpasan a naidungpar ti nagluganan da a motorsiklo iti maysa a poste iti Brgy. 29 ditoy ciudad ti Laoag.
Nabigbig ti driver a ni Michael Valdez, agtawen ti 32, naasawaan idinto a ti lubbonna ket ni John Mark Natividad, agtawen ti 26, awanan asawa ken agpada a residente iti Brgy. Margaay iti ili a Vintar.
Segun kenni Patrolman Paul John Rosete, bayat nga agpapadaya da a direksyon a sakupen ti Laoag-Sarrat Road idi kellaat a naawanan ti kontrol motorsiklo da a nangitunda ti pannaka-slideda iti kalsada ken pannakaidungparda iti maysa a sementado a poste iti sangoanan ti gate ti pagtaengan da Imelda Tumaneng, agtawen ti 57, awanan asawa ken residente iti nadakamat a Barangay.
Nagsagaba dagiti biktima ti sugat iti nagduduma a paset ti bagida kangrunaan iti uloda a poon ti pannakatay da.
Gapu iti daytoy, dagus met a naitaray dagiti biktima iti Governor Roque B. Ablan Sr. Memorial Hospital ngem naideklara a dead-on-arrival.
Inbatad ni Patrolman Rosete a segun kadagiti kabagyan dagiti biktima ket naggapu dagitoy iti maysa a pasken ket ditoyda a nagi-inumda ti arak.
Naammoan a nakasuot met dagitoy ti helmet.
