LAOAG CITY – Pimmusay dagiti dua a lallaki kalpasan ti napasamak a desgrasya iti paset ti Brgy. 22 iti ili ti San Nicolas.
Nabigbig dagitoy nga isuda Flaviano Macatumbas Jr y Gamayon, agtawen ti 44 residente iti Brgy. 20 iti ili ti San Nicolas ken ti pasahero na a ni Gerome Querabo y Umayam, agtawen ti 29 ken tubo iti San Pablo,Isabela.
Basar iti imbestigasyon dagiti otoridad, agpapaamianan a direksyon ti minu bus nga addaan ti ruta a Laoag-Badoc idi kellat a simmabat ti maysa a tricycle a nang-overtake ti kotse nga agpapaabagatan a direksyon.
Gapu iti daytoy, naidungpar ti tricycle iti sango ti bus ken gapu iti kinapigsa ti impact ket naipurwak dagiti nakalugan iti tricycle.
Mainaig iti daytoy, kuna ti driver ti bus a ni Jonathan Yarte tubo iti Sinait, Ilocos Sur, saan na a napakadaan ti pannakisinnabat iti tricyle a nag-overtake isut gapu na saan na a naleppedan ti pannakidinnungparna.
Kabayatanna, saan met a naan-ano ti nangiturongti kotse a ni Fr. Noel Dacuycuy iti Iglesia Filipina Independiente iti siudad ti Batac.
Iti agdama ket agtultuloy ti imbestigasyon dagiti otoridad seknan iti nasao nga insidente.
