LAOAG CITY – Natiliw dagiti otoridad ti dua a lallaki babaen iti naisayangkat a Anti-Illegal Drug Buy-Bust Operation iti Brgy. Magnuanag iti siudad ti Batac.
Binibig ti Philippine National Police iti siudad ti Batac ti subject a ni Maynard Manglan-lan, driver iti lokal a gobierno, ken residente iti Brgy. Bil-loca, idinto a ti kadua ti subject ket ni Justine Gongora, residente iti Brgy. Rayuray iti nasao a siudad.
Naarestar ti subject kalpasan a maipagarup a naglako ti maysa a pedaso ti sachet a naglaon iti maatap a shabu iti nagpammarang a poseur buyer.
Nakumpiskar manipud iti subject ti 16 a pedaso ti plastic sachet a naglaon iti maatap a shabu ken maysa a ribu a pisos a nausar kas buy-bust money.
Inadmitir ti subject nga adda pay dagiti nagduduma klase ti drug paraphernalia iti lugan na kas iti aluminum foil.
Mainaig iti daytoy, agdagsen ti 5 grams dagiti nakupiskar a sachet ken mapattapatta nga aggatad ti P34,000.
Nupay kasta, nagkedked a mangipaay ti detalye ti suspek maipapan kadagiti nakumpiskar dagiti otoridad kenkuana.
Naammoan nga High Value Individual ken Newly Indentified Subject maipapan iti nasao a banag.
Kabayatanna, nagtalinaed ti subject iti kuerpo ti Philippine National Police iti siudad ti Batac para iti naan-anay nga imbestigasion ken pannakapila ti kaso kontra kenkuana.
