LAOAG CITY – Natiliw ti dua a lallaki iti border control iti ili ti Badoc gapu iti panagusar da ti peke a dokumento.
Daytoy ti inpakaammo ni Police Major Jephre Taccad, ti pannakangiwat ti Ilocos Norte Police Provincial Office (INPPO).
Segun ken ni Taccad, dagiti natiliw ket nakalugan ti
Isuzu Elf close Van nga addaan ti plate number nga ABB6278.
Inbaga na a ti driver ket agtawen ti 31, taga Parañaque ken ti helper na ket agtawen ti 21 taga Laurel, Batangas.
Inlawlawag na a pasado alas-9:40 idi rabii a dimteng ti lugan iti border iti ili ti Badoc ken kas protocol ket adda dagiti dokumento a nasken nga ipakita dagiti maseknan.
Nupay kasta, naduktalan a ti inpakita nga RT-PCR test result dagiti dua ket peke isut gapuna a naipadalan da iti antigen test kalpasan na ket naipan da iti kwerpo ti pulisya iti nasao nga ili para iti naan-anay a pannakaimbestigar da.
Maisagsaganan ti maipila a reklamo mainaig iti panaglabsing iti Republic Act (RA) 10951 wenno Falsification by private individual and use of falsified documents.
