LAOAG CITY – Agpada a pimmusay dagiti dua a biktima ti desgrasya iti Bypass road, bisinidad ti Brgy. Bengcag ditoy siudad ti Laoag.
Nabigbig dagiti biktima nga isuda Jim Prince Valdez, agtawen ti 19 ken residente iti Brgy. Sungadan iti ili ti Paoay ken ti lubbon na a ni CK Leano, addan iti ligal nga edad ken tubo iti probinsya ti Cagayan.
Basar iti impormasyon ti PNP Traffic Division ditoy siudad ti Laoag, naglubbon dagiti biktima iti motorsiklo a Yamaha R3 nu sadino a ti driver ket ni Valdez.
Agpapaabagatan a direksyon dagitoy nu ken napaspas ti tarayda rason a na-overshoot ti kalsada.
Gapu iti daytoy, naidungpar da iti concrete barrier ken steel signage iti kannawan a paset ti kalsada.
Dagus a naitaray dagiti biktima iti ospital ngem naideklarar dagitoy a dead on arrival.
Kabayatanna, naamoan nga agpada nga adda iti impluwensya ti nasanger dagiti biktima ken ti laeng driver a ni Valdez ti nakasuot ti helmet.
Iti agdama ket agtultuloy ti imbestigasyon dagiti otoridad seknan ti nasao nga insidente.
