LAOAG CITY – Kinumpirmaran ni Mr. Rodel Balisacan, agdama nga agnanaed iti Barangay Bil-loca iti ciudad ti Batac a pagayam na met laeng ti nangtakaw iti dua a laptop ken maysa a kwintas.
Segun kenni Balisacan, intaray ti suspek dagiti dua a laptop bayat nga adda da iti ili ti Banna idi kalman.
Dinakamat na a kukua na ti maysa a laptop idinto a ti maysa ket naipatarimaan kenkuana.
Inlawlawag na a naam-ammo na daytoy addan ti nasurok makabulan ti napalabas ken nakadua na pay iti grupo da.
Nupay kasta, kunana nga iti nadlaw na ti madi nga aramid ti suspek ket pinagtalaw nan daytoy ngem saan na nga inpagarop nga agsubli ken itaray na dagiti dua a laptop.
Kunana a ti pay ibagbaga kenkuana ti suspek idi ket adda iti ballasiw taaw ti ina na ken adda ti 30 a ribo a pisos nga allowance na iti binulan.
Naamoan nga ado pay a nagan ti us-usaren ti suspek ken taga ditoy ciudad ti Laoag.
Kabayatanna, inbatad ni Police Major Antonio Marzan Jr., ti deputy chief of police ti PNP-Batac nga agbalor amin ti 69 a ribo a pisos ti intaray ti suspek.
Ummuna iti daytoy, idi nadlaw ni Balisacan a mapukpukaw ti sumagmamano a gamit na ket kinita na adagus ti CCTV ken nakumpirmaran a ti suspek ket isu ti dati na nga helper.
Inbatad na nga ikoordinar da daytoy iti nagduduma a police station ti pasamak gapo ta basar iti nakalap da nga impormasyon ket saan laeng nga iti ciudad ti Batac ti nagtakawan ti suspek.
Iti agdama, agtultuloy ti imbestigasyon da ket isagsagana da metten ti reklamo a maipila kontra iti suspek.
