LAOAG CITY – Madanagan da House Senior Deputy Speaker Aurelio “Dong” Gonzales Jr. ti Pampanga ken Deputy Speaker David “Jay-Jay” Suarez ti Quezon iti maipagarup a peke a social media accounts a mangikalkalintegan ken ni dati a Presidente Rodrigo Duterte.
Para kada Gonzales ken Suarez, dagiti nasao a fake account ket maibilang a pangta kadagiti botante ken iti demokrasia gapu ta manmanipularen daytoy dagiti isyu a mabalin a makaapektar iti resulta ti 2025 Midterm Elections.
Gapu iti daytoy, nagpanawagan ni Gonzales ti maysa a nailian nga addang tapno protektaran dagiti botante manipud iti digital deception iti babaen ti panagtitinnulong ti pannakairubuat kadagiti maseknan nga ahensia ti gobierno ti National Digital Literacy Program kontra kadagiti disinformation campaign.
Nagpanawagan met ni Suarez kadagiti dadakkel a social media platform kas ti Meta, X a dati a Twitter ken YouTube nga insigida nga agtignay ken seryoso a solbaren ti problema dagiti fake account nga aggigiddan nga agiwarwaras ti disinformation.
