LAOAG CITY – Nagsinnapgud ti maysa a pick-up ken SUV iti paset ti Brgy. Ngabangab iti ili ti Pasuquin.
Segun ken ni Police Chief Master Sergeant Roel Silvestre, ti Deputy Chief of Police iti nasao nga ili, kabayatan a dumaldalyasat ti maysa a pick-up a Navarra nga agpapamianan a direksion ket kellaat a rumuar ti maysa nga SUV a Fortuner nga aggapu iti daya a direksion.
Inbatadna a gapu iti daytoy ket saanen a nakontrol pay dagiti agpada a driver ti manibela a nangitunda ti pannakadesgrasiada.
No pay kasta, kuna ni Silvestre nga awan ti nadangran kadagiti maseknan ngem nadadael ti sumagmamano a parte ti inturongda a lugan.
Mainaig iti daytoy, inpakaamo na nga agpada a napaspas ti taray dagiti dua a lugan.
Inlawlawagna a saanna met a masinunuo no adda impluwensiya ti nasanger dagiti agpada a driver kabayatan iti panagmanehoda.
Innayon ti Deputy Chief of Police ti PNP Pasuquin a dagus met laeng a naginnareglo dagiti agsinnungbangir a partido kalpasan ti napasamak a desgrasia.
Kabayatanna, saanna metten nga inrakurak ti pakabigbigan dagiti maseknan.
