LAOAG CITY – Kinumpirmaran ni Police Capt. Joseph Tayaban, ti chief of police iti ili ti Badoc nga adda ti dua a maipagarop nga albularyo wenno agil-ilot a nakalibas a simrek ditoy probinsya ken mapan da koma iti ili ti Bangui.
Iti eksklusibo nga interview ti Bombo Radyo Laoag ken ni Tayaban, inlawlawag na a naduktalan ti pannakastrek dagiti dua a lalaki nga agtawen ti 60 ken 71 ditoy probinsya kalpasan a nadesgrasya da iti ili ti Bacarra.
Inlawlawag ni Tayaban nga iti panagimbestigar da ket naamoan a saan a nagna dagiti maseknan iti border control iti ili ti Badoc ken nagna dagitoy iti maar-aramid a mini-dam iti Sinait, Ilocos Sur.
Segun ken ni Tayaban, adda ti napan nangsabat kadagiti dua nga albularyo iti ili ti Badoc ken ti nagluganan dagiti maseknan a tricycle ket inbati da iti ili ti Sinait ken nagnagna dan a napan iti agur-uray a mangsukon kadakuada.
Iti baet nga iti ili ti Bacarra ti nakadesgrasyaan dagiti maseknan ket inturnover ti PNP-Bacarra dagiti dua iti PNP-Badoc.
Inbaga ni Tayaban nga adda ti linabsing dagiti maseknan isut gapuna nga apaman a makompleto dagiti kasapulan a dokumento ket ipila dan ti reklamo babaen ti regular filing.
Nupay kasta, kuna na a 12 nga oras laeng ti mabalin a panagtalinaed dagiti maseknan iti kustodyar da ken kalpasan iti daytoy ket iturnover danto met dagitoy iti ili ti Sinait tapno makasubli da iti bukod da a lugar.
