LAOAG CITY – Balligi ti dua a nagsina nga operasyon nga insayangkat ti Philippine National Police iti ili ti Badoc nga indaulwan ni Police Major Joseph Tayaban, ti chief of police iti nadakamat nga ili.
Ummuna a natiliw dagiti tallo nga indibidual pakairamanan dagiti dua a mangisursuro ken maysa a mannalon iti Barangay Morong, Badoc.
Nabigbig dagiti natiliw a da alyas Ibiana, agtawen ti 62; alyas Alona, agtawen ti 29, naasawaan, maysa a mangisursuro ken ni alyas Aleli, agtawen ti 34, naasawaan, maysa laeng laeng a mangisursuro, agpapada dagitoy a residente iti nadakamat a barangay.
Segun kenni Tayaban, naaktoan dagiti otoridad dagiti tallo nga indibidual nga agay-ayam ti tong-its.
Nakumpiskar dagiti otoridad ti pusta a nasurok sangaribo a pisos, baraha ken dadduma pay a gambling paraphernalia.
Kabayatanna, natiliw met dagiti lima pay nga indibidual gapo iti iligal met laeng a sugal iti Sitio Paratong, Barangay Saud iti nasao nga ili.
Dagiti natiliw ket agtawen ti 68, mannalon; agtawen ti 44 nga housewife; agtawen ti 30, addaan ti live-in partner ken ti agtawen ti 44 kasta pay ti nakalibas nga agnagan ti Matilde ken dagitoy ket nagay-ayam ti pusoy dos.
Nagtalinaed met dagitoy iti kustudiyar ti PNP-Badoc ken mapilaan dagitoy ti kaso.
