LAOAG CITY – Adda ti dua a member-consumer owner ti Ilocos Norte Electric Cooperative ti naipilaan ti reklamo babaen ken ni Assistant Manager Cipriano “Perry” Martinez.
Naamoan a dagitoy ket manipod iti ili ti Dingras ken Bacarra.
Pinilaan ti kooperatiba dagiti dua a nasao a member-consumer kalpasan a naduktalan a nagtakaw da ti kuryente babaen ti illegal a panangikonektar ti linya ti kuryente ken pannakatamper ti metro ti kuryente.
Kuna ni Martinez a rumrumuar a nabayagen daytoy nga ar-aramiden dagiti suspek ken ad-adda pay a napaneknekan da babaen ti naiget a panagmonitor da.
Inpasigurado ni Martinez nga addanto pay dagiti sumaruno a mapilaan ti reklamo kadagiti sumarsaruno nga aldaw.
Innayon na a masapol a madalusan ti kooperatiba manipod kadagiti agtaktakaw ti kuryente a member-consumers gapu ta dakkel ti epekto na daytoy kadagiti regular nga agbaybayad ti bill na gapu ta ti system loss ket
pagbibingayan da metlaeng a bayadan.
