LAOAG CITY – Saan pay a nabirukan dagiti kameng ti PNP-Batac dagiti dua a menor de edad a nangkabkabil iti maysa a tricycle driver a ni Dexter Domingcil iti Barangay Valdez iti nasao a ciudad.
Daytoy ti inbatad ni Police Staff Sergeant Famy Curammeng iti PNP-Batac.
Segun kenni Curammeng, nupay saan da pay a nabirukan dagiti menor de edad ket nakikoordinar dan iti Muslim Compound ken kadagiti nagannak dagiti maseknan nga ubbing.
Kinumpirmaran pay ni Curammeng nga addan iti nasayaat a kasasaad ti nasao a tricycle driver ngem saan da pay a naalaan ti statement gapo ta saan pay unay a makasao daytoy.
Maipalagip a nagay-ayam ti biktima ken dagiti suspek ti basketball sakbay da a naggi-inom iti asideg ti maysa a pagadalan iti nasao a ciudad.
Kalpasan daytoy ket nagpaitulod dagiti dua a menor de edad ken ni Domingcil ngem idi nakadanon da iti nagbedngan ti Brgy. Valdez ken Brgy. Ben-agan ket kinabkabil dagiti suspek ti biktima.
Naamoan nga indanog dagiti suspek ti bato iti ulo ni Domingcil ken pinangpang-or da pay daytoy.
