LAOAG CITY – Inpakaammo ni PLt. Roi Manuel Ordonio, ti hepe ti PNP iti ili ti Pinili a napagmulta ti nagannak dagiti dua a menor ded edad a nanggandat a nanglibas kadagiti otoridad bayat ti pannakasita dagitoy gapu iti kaawan ti suot da nga helmet.
Segun ken ni Ordonio, nasita dagiti menor de edad iti paset ti Brgy. Pagdilao bayat nga agpatpatrolyo dagiti otoridad gapu ta awan ti suot nga helmet dagitoy.
Nu pay kasta, inbatad na nga iti pannakasita dagitoy ket pinataray dagitoy ti nagluganan da a motorsiklo rason a kinaat dagiti otoridad agingga iti paset ti Brgy. Tartarabang.
Kuna na nga idi awan ti pagkamangan dagiti menor de edad ket dita a nagsardeng da ken nakamatan dagiti pulis.
Inpakaammo ni Ordonio a naimbitaran dagitoy iti stasyon ti kapulisan pakairamanan ti nagannak kadakuada ken naisyu ti ticket gapu iti panaglabsing iti parental responsibility.
Mainaig iti daytoy, inbatad ni Ordonio a basar iti palawag dagiti nagannak, saanda nga ammo a rimuar dagiti dua a menor de edad ken nagiturong dagitoy iti motorsiklo.
Immuna metten nga inpakaammo ti hepe a ti napalabas a maysa a lawas ket umabot iti 177 dagiti nasita gapu iti kaawan ti suot dagitoy nga helmet.
