LAOAG CITY – Agtultuloy a maag-agasan dagiti dua a menor de edad kalpasan a naidungpar ti nagluganan da a motorisiklo iti puon ti mahogany iti paset ti national highway idiay Brgy. Valdez iti ili ti Marcos.
Nabigbig dagiti biktima a da Charles Miguel y Puriran, agatwen ti 17, driver ti nasao a motorsiklo idinto a ti lubbon na ket ni Aljun Miguel y Tamayo, agtawen ti 16, agpada a residente iti Brgy. Pacifico iti nasao nga ili.
Segun iti imbestigasyon, bayat nga agpapaabagatan a direksyon ti motorsiklo nga inturong ni Charles ket naawanan ti kontrol iti manibela a nangitunda ti pannakaidungpar da iti puon ti mahogany.
Gapu iti daytoy, nagpasar ti sugat ti ulo na ni Charles, idinto a natukkol ti akin-kannawan a saka na ni Aljun.
Dagus met a naitaray iti Josefa Memorial Marcos Disrict Hospital iti nasao nga ili dagiti biktima ngem naiyakar da iti Mariano Marcos Memorial Hospital and Medical center idiay ciudad ti Batac para iti naan-anay a pannakataming da.
