LAOAG CITY – Napasamak ti nakaam-ames a desgrasya iti agkurba a paset ti Barangay Magnuang idiay ciudad ti Batac a nakatayan ti naglubbon ti motorsiklo nga agpada a menor de edad nakadinnungpar ti maysa a dump truck.
Nabigbig dagiti biktima a da John Lloyd Badua ken ni Christian Roy Moises Miguel, agpada a menor de edad ken residente dagitoy iti Barangay Quiling Norte iti ciudad ti Batac.
Segun iti ina ni Miguel, ti pakada kenkuana ti anak na ket mapan da iti Poblacion ngem nakigtot idi makita na iti facebook ti desgrasya ken ti laeng nakalasinan na ti anak na ket ti bado ken pantalon na.
Iti agdama ket addan iti kustodyar ti pulisya ti driver ti truck a ni Allen Steven Bartolome y Acacio, agtawen iti 34, taga Barangay 6, Parot idiay ili ti Vintar.
Inkalintegan ni Bartolome a bayat ti panagpapa-abagatan a direksyon ken nabigla idi adda ti masabat na a nakapaspaspas a motorsiklo isut gapuna nga inpreno na ken limmiklik ngem napan latta ti motorsiklo iti linya na.
Gapu ti napigsa ti napasamak ket nagudua ti bagi ti maysa kadagiti biktima ken napirpisay idinto a ti maysa ket naipasiruk iti truck.
Immunan nga inbatad iti Bombo Radyo ni Police Major Allan Emerson Dauz, ti chief of police iti ciudad ti Batac a pilaan da ti kaso a reckless imprudence resulting in homicide ti driver ti truck.
