LAOAG CITY – Pimmusay dagiti dua nga indibidual kalpasan a naidungpar ti nagluganan da a motorsiklo iti puon ti gmelina iti Solsona-Carasi-Piddig Road iti Barangay Barcelona iti ili ti Solsona.
Nabigbig dagiti biktima nga isuda John Rey Mangoma, agtawen ti 34 ken residente iti Barangay Darasdas nga isu ti nangiturong iti motorsiklo ken ti kinalubbon na a ni Rommel Cabacungan, agtawen ti 22 ken residente iti Barangay Barcelona iti nasao nga ili, ken agpada dagitoy a beautician.
Segun kenni Police Captain Randy Damo, ti chief of police ti Philippine National Police iti ili ti Solsona, iti inisyal nga imbestigasyon da ket rumrumuar nga aggapo iti ili ti Piddig dagiti biktima ken agpadaya da idi mapapati a naawanan ti kontrol iti manibela ti driver a nangitunda ti pannakaidungpar da iti puon ti kayo.
Kas resulta, nagsagaba dagiti biktima ti nakana a sugat iti ulo ken nagduduma a paset ti bagi da no sadinno dagus a pimmusay ti driver idinto a naitaray met iti Piddig District Hospital ngem naideklara a dead on arrival.
Kunana nga iti panangreview da iti CCTV footage ket saan met a napaspas ti panagpataray ti driver ken awan met ti mangipaneknek a nakainom da ti nasanger ngem saan da a nakasuot ti helmet ken high visibility vest.
Kabayatanna, kunana a basar iti pamilya dagiti biktima ket nagpakada dagitoy a mapan da ag-service iti ili ti Piddig ken mabalin a gapo iti bannog ken puyat da ket posible a nairidep ti driver.
