Umabot iti 86 ti balligi a nakaidonar ti dara iti naggedan a bloodletting activity iti Barangay Barani iti ciudad ti Batac ken Barangay Sungadan iti ili ti Paoay a nakikammayetan ti Bombo Radyo Laoag.
Segun kenni Mrs. Caroline Alegado manipud iti Brgy. Masintoc, Paoay, naragsak ti rikna na gapo ta ti indonar na a dara ket makatulong iti kaadoan partikular kadagiti agkasapulan.
Inbatad na a daytoy ti ummuna a gundaway a nagidonar ti dara.
Mainaig iti daytoy, kuna ni Sangguniang Bayan Member Efren Valdez iti nasao nga ili a dakkel a tulong ti maukkon a dara kadagiti kailyan ken kaprobinsyaan nga agkasapulan iti daytoy.
Kunana a maragsakan pay dagiti nagidonar gapo ta adda pay ti naawat da a t-shirt manipud iti Bombo Radyo ken karaman kadagitiy nagidonar ket dagiti estudyante manipud iti Data Center College of the Philippines.
Umabot met iti 33 a balligi a nakaidonar ti dara iti nasao nga ili.
Ti nasao a bloodletting acvitity ket nakikammayetan pay ti Samahang Ilokano ken ti MakaPaoay Chapter Philippine Guardian Brotherhood Incorporated nga idadaulwan ni Barangay Chairman Manolito Buduan.
Mainaig iti daytoy, nagyaman ni Barangay Chairman Jogie Calapao Kabayatanna, iti met Barangay Barani iti ciudad ti Batac kadagiti amin a nagidonar ti dara nga umabot iti 53.
Inlawlawag na nga ita a gundaway ket ad-ado ti nagidonar nupay kastoy ti panawen nga adda ti pandemya.
Kabayatanna, kas paset ti pannakaipaay ti tulong kadagiti naapektaran a residente idiay probinsya ti Cagayan ken Isabela ket agtultuloy ti panagawat ti Bombo Radyo Foundation Incorporated iti donasyon.
Immunan a nakaipadanon ti Bombo Radyo ti 400 a sako ti bagas ken relief goods kadagiti residente a naapektaran ti bagyo kadagiti nadakamat a probinsya.
