LAOAG CITY – Kinumpirmaran ni Doctor Norman Rabago, ti Covid-19 consultant ditoy Ilocos Norte nga adda ti dua a pimmusay a nagpositibo ti covid-19 ditoy probinsya.
Inbaga na a ti maysa a pimmusay ket taga ditoy ciudad ti Laoag idinto a ti maysa ket taga Badoc, Ilocos Norte.
Inlawlawag na a ti natay a taga Laoag ket nabayag a naka-confine iti Mariano Marcos Memorial Hospital and Medical Center iti ciudad ti Batac ken isuna ket dati a kidney transplant patient.
Nupay kasta, kuna ni Doctor Rabago nga idi naipan iti ospital ti pasyente ket negatibo ti covid-19, ngem kalpasan ti sumagmamano nga aldaw ket nagpositibon daytoy iti virus.
Kabayatanna, ti met natay a taga Badoc ket dimteng iti border idi rabii ti martes, ken iti idadalan na ti antigen test ket nagpositibo isut gapuna nga inderetso da iti municipal isolation facility.
Innayonna nga iti kabigatan na ket nakita nga unconscious ti pasyente isut gapu na nga intaray da iti ospital iti ciudad ti Batac ngem naideklara a pimmusayen.
Inpakaammo ni Dr. Rabago a ti pimmusay a taga Badoc ket adda ti fracture ti saka na idi dimteng iti border iti ili ti Badoc.
