LAOAG CITY – Nagduduma a klase ti paltog, balbala ken magazine ti nakumpiskar iti dua a nagsina a search warrant operation a naiyuswat iti ili ti Pasuquin.
Daytoy ti inpakaammo ni PMaj. Vencioly Luzano, ti hepe ti PNP-Pasuquin.
Segun kenkuana, immuna a naiyuswat ti operasyon iti Brgy. San Juan iti nasao nga ili ken ti subject ti operasyon ket nabigbig a ni Celwin Vincent Butac.
Inbatad na nga iti panagsukimat dagiti kameng ti INNPO ken Pasuquin MPS ket narekobre ti homemade calibre 9mm, magazine para iti calibre 30 rifle, maysa pedaso a long ken short magazine ti M16 rifle.
Kuna na a karaman ditoy ti dua a kahon a naglaon ti 30 a bala ti calibre 45, uppat para iti calibre 22, 36 a bala para iti calibre 9mm ken pito a bala para iti calibre M16 rifle.
Immuna iti daytoy, inpakaammo ni Luzano a naiyetnag ti search warrant babaen ken ni Judge Richard Balucusio iti 2nd Municipal Trial Court Pasuquin Burgos kalpasan nga adda dagiti report nga adda iti ikot nga armas ti suspek.
Kabayatanna, kuna ni Luzano nga iti naiyuswat nga operasyon iti Brgy. Carusikis partikular iti pagtaengan ti subject a Erwin Adredo y Calzada ket narekobre met ti nagduduma a klase ti bala ken magazine.
Inlawlawag na a nakumpiskar ti dua a pedaso ti magazine a para iti carbine rifle, 20 a bala para iti calibre 30, maysa pedaso a plastic magazine para iti m16 rifle nga addaan ti bala nga innem a pedaso pakairamanan ti case ti antiohos a naglaon ti dua a bala para iti shotgun.
Manamnama a sumango dagiti dua a suspek iti kaso a panaglabsing ti RA 10591 wenno ti iligal a panagikot ti armas.
