LAOAG CITY – Inbatad ni Fire Supt. Roxanne Parado, Provincial Fire Marshall iti Bureau of Fire Protection ditoy probinsia ti Ilocos Norte a nakairekord ti dua a nagsina nga uram kabayatan ti iduduprak ti Bagyo Kristine.
Napasamak ti immuna nga insidente ti uram ti maysa nga apartment iti Brgy. Nangalisan-B ditoy siudad ti Laoag idi Oktubre 23, 2024.
Basar iti imbestigasion, rumrummuar a ti namungayan ti uram ket gapu iti electrical short circuit iti wiring ti apartment.
Mainaig iti daytoy, ti maikadua nga insidente ket iti maysa a garahe iti Barangay Poblacion iti Pasuquin a nauram no sadinno agtultuloy pay laeng ti imbestigasion.
Kinunana a dagos a nasebseban ti apoy gapu iti panagtitinnulong dagiti residente babaen iti bucket brigade bayanihan system nga inpatungpal ti Bureau of Fire Protection.
Gapu ti daytoy, nagpalagip ni Parado iti publiko nga agananad nangruna ta mapaspasaran iti agdama ti epekto ni Bagyo Kristine.
Kabayatanna, inpakaammona nga umabot iti 360 a personnel ti Bureau of Fire Protection ditoy probinsia ti naka-full alert status.
