LAOAG CITY – Natay ti nangiturong ti motorsiklo kalpasan ti panagdinnungparda iti padana a nakamotorsiklo iti paset ti Josefa Llanes Escoda National Highway Barangay Juan iti ili ti Solsona.
Segun ken ni P/Capt. Chris Anthony Sorsano, Hepe ti Solsona Municipal Police Station, ti biktima a nangiturong ti motorsiklo nga Euro 125 ket agtawen ti 55, naasawaan ken ti kinalubbonna ket agtawen ti 17 a maysa nga estudiante nga agpada a residente ti Barangay Manalpac iti ili ti Solsona.
Inbatadna a ti nangiturong ti maysa met a motorsiklo nga Suzuki Rider 150 ket maysa nga estudiante ken residente ti Barangay Maananteng iti ili ti Solsona.
Inlawlawagna a basar iti inwayatda nga imbestigasion, kabayatan a dumaldalyasat ti nangiturong ti Euro 125 nga agturong nga agpa-daya ket kellaat nga immagaw iti linya ti kalsada ti nangiturong ti Isuzu Rider 150 nga agturong met nga agpa-laud a nangitunda ti panagdinnungparda.
Gapu iti daytoy, kunana a naideklarar a dead on the spot ti biktima idinto ti kinalubbonna ken ti kinadinnungparda ket naitaray iti Mariano Marcos Memorial Hospital and Medical Center iti siudad ti Batac para iti naan-anay a pannakataming dagitoy.
Innayonna nga iti agdama ket saan pay a nagsarita ti agsumbangir a partido seknan iti napasamak a desgrasia.
