LAOAG CITY – Kinumpirmaran ni Barangay Chairman Elmar Siazon iti Barangay 28 ditoy ciudad ti Laoag nga adda ti dua a dakkel a baboy a natay ken nakita iti irigasyon a sakop ti barangay da.
Nupay kasta, inpetteng na a dagiti dua a baboy ket awanen ti dutdot no sadinno a daytoy ti pagilasinan nga adayo ti naggapwan da.
Mamati ni Siazon a dagiti baboy ket aggapo iti dumaya a paset ti barangay da.
Inlawlawag na a ti irigasyon ket aggapo iti ili ti Vintar ken ado pay laeng a barangay ditoy ciudad ti pagdalanan na sakbay a madanun na iti barangay da.
Inpalgak na pay a saan laeng a daytoy ti damo nga adda dagiti naiyanud a dingwen ken nakita iti irigasyon a paset ti barangay da.
Innayon na nga ado pay dagiti basura a maiyan-anud iti irigasyon a no makadanun iti barangay da ket nakaad-adon gapu ta maurnung dagitoy.
