LAOAG CITY – Kinumpirmaran ni Senior Inspector Ronald Castillo, ti City Fire Marshal ti Bureau of Fire Protection ditoy Siudad ti Laoag a nauram ti dua a pagtaengan iti paset ti Brgy. 25, Sta. Cayetana ditoy Siudad.
Segun kenkuana, agarup 1:19 itay laeng parbangon idi nakaawat ti tawag ti Fire Station da nga adda ti maur-uram rason a dagus met dagitoy a nagresponde iti lugar.
Inbatad na nga idi dimmanon da iti kugar ket dakkelen ti apoy rason a naipangato iti maikadua nga Alarm.
Inlawlawag na nga alisto a nagramram ti apoy gapu ta naaramid laeng ti light materials dagiti dua a pagtaengan.
Kunana nga immun-una a nauram ti maysa a pagtaengan a bunggalo agingga a nairamraman ti kaabay na a pagtaengan.
Mainaig iti daytoy, inpakaammo na a timmulong pay a nagresponde dagiti dadduma pay a Fire Station kas ti BFP San Nicolas, BFP Sarrat, BFP Vintar, BFP Batac ken BFP Bacarra para iti al-alisto a panagsebseb ti apoy.
Dinakamat na nga awan ti nadangran iti dua a pamilya a naapektaran ti napasamak nga uram.
Naammoan nga umabot iti nasurok-kumurang 20 a minuto sakbay a naideklara ti fire out kadagiti dua a pagtaengan.
Kabayatanna, iti agdama ket saan met pay a masinunuo no ania ti makaigapu iti pannakaitunda ti nasao nga uram gapu ta mannarimaan pay laeng ti naun-uneg nga imbestigasion.
