LAOAG CITY – Kinumpirmaran ni Police Capt. Jhonveill Maramag, ti chief of police iti ili ti Marcos nga adda ti napasamak a komosyon iti nagbaetan ti dua a pamilya iti Barangay Lydia iti nasao nga ili.
Iti eksklusibo nga interview ti Bombo Radyo Laoag ken ni Maramag, inbatad na a nabayagen nga agrirriri ti pamilya Andres ken Pamilya Saclayan gapu iti daga ngem itay bigat ti maibilang a kakarwan.
Inlawlawag na a naiteden ti Certificate of Transfer ti daga iti pamilya Andres manipod iti Department of Agrarian Reform (DAR) a dati ket ti bagi ti pamilya Saclayan.
Nupay kasta, saan a maawat ti pamilya Saclayan a bagin ti pamilya Andres ti nasao a daga.
Inbatad ni Maramag nga iti papan koma panagtractor ni Mr. Fredolin Andres ket napan dinarop ti grupo ni Mr. Bonifacio Saclayan ken nagarmar dagitoy ti buneng ken batbato.
Gapu iti daytoy, inasot ni Andres ti paltog na a kalibre 45 a pangsalaknib na ti bagina.
Inpetteng ni Maramag nga adda ti nalabsing ni Andres gapu ta awan ti permit to carry firearm.
Innayon na a pilaan da ti reklamo a panaglabsing iti Republic Act (RA) 10591 wenno Illegal Possession Of Firearms And Ammunition idinto nga ireklamo da met ti Attempted homicide ken Unjust Vexation ti grupo ni Saclayan.
