LAOAG CITY – Nabakal manen dagiti dua a pampasahero a bus ti Florida babaen dagiti nakalugan ti maysa a motorsiklo iti Brgy. Barit ditoy siudad ti Laoag.
Daytoy ti klinumpirmaran ni Mr. Jerwin Reyes, kundoktor ti pampasahero a bus.
Kuna na nga awan ti helmet wenno saan a nakaabungot dagiti dua a lakkai a naglugan iti motorsiklo a kadaanan a wave.
Segun kenni Reyes, saan na a nailasin ti rupa dagiti bimmato bayat ti panagturong da iti probinsya ti Cagayan.
Inbatad ni Reyes nga awan kadagiti pasahero ti nadangran kalpasan ti insidente.
Nagcrack ti windshield ti nasao a pampasahero a bus.
Kabayatanna, naipadanun met iti Bombo Radyo ti panakabakal ti maysa pay a pampasahero a bus ti nasao a kompanya itay agarup alas sais itay bigat iti paset ti bypass road.
Basar iti report, naboung ti maikapat a tawa iti kannawan ken maikatlo a tawa iti kannigid a paset ti bus babaen ti natangken a banag.
Naamuan a mapan kuma iti terminal da tapno agala kadagiti agbiyahe a pasahero.
Maipalagip a nabakal ng immuna ti maysa a bus ti nasao a kompanya iti ili ti Currimao iti daytoy a bulan ti Enero.
