LAOAG CITY – Naubor ti dua a pampasahero a bus kabayatan a dumaldalyasat iti paset ti Barangay Mabusag Norte iti ili ti Badoc.
Segun ken ni Mr. Pepe Miranda, maysa kadagiti driver ti pampasahero a bus a naubor, kabayatan ti panagbiaheda nga aggapu idiay siuadad ti Baguio ket kellaat lattan nga adda ti nagsasaruno a nangubor iti luganda.
Gapu iti daytoy, kunana nga insigida a nagsardengda ket ditoy a nakitada nga adda ti buong ti akin-tengnga ken maudi a paset ti tawa iti ipaspasadana a bus.
Inlawlawagna nga awan met dagiti naimatanganda a posible nga adda iti likudan iti panangbakal iti luganda.
Nupay kasta, inbatadna a nakitada nga adda dagiti nabuong a bote ken batbato a mabalin nga inusar dagiti saan pay a nabigbig nga indibidual nga akin-aramid iti panangubor iti bus.
Mainaig iti daytoy, kuna ni Miranda nga insigidada met nga in-report daytoy a pasamak iti Badoc Municipal Police Station no sadinno a nangiwayat ti panagronda dagiti otoridad iti lugar a nakapasamakan ti insidente ngem awan ti nakitada.
Kabayatanna, malaksid iti daytoy ket adda pay ti maysa a pampasahero a bus ti naubor iti nasao met laeng a barangay a nangitunda ti pannakabuong met ti maysa a tawa daytoy.
Naammoan nga adda ti sumurok 20 a pasahero ni Miranda a nakalugan iti bus idi napasamak ti insidente ken saan a nadangran dagitoy.
