LAOAG CITY – Inpakaammo ni Major Bryan Albano, Civil Military Operations Officer of the 501st Infantry Valiant Brigade ti Philippine Army nga adda ti dua a rebelde a nagsubli iti sidong ti gobierno.
Segun kenkuana, dagiti saanen a nainagan a dati a rebelde ket manipud iti KLG North Abra nga aktibo nga agop-operar iti probinsia ti Abra.
Inbatadna a babaen iti panagsuko dagitoy ket adda dagiti maam-ammoanda nga impormasion no ania a lugar ti paglemlemmengan dagiti makakannigid a grupo.
Malaksid iti daytoy, kunana nga awan metten dagiti dadduma pay a Communist Terrorist Group a maob-obserbaranda nga agop-operar iti rehion uno.
Nupay kasta, inpalgakna a saanda nga agpakampante isu nga agtultuloy latta ti panangisayangkatda ti Enhanced Comprehensive Livelihood Integration Program tapno maalay-ayan ti rikna dagiti umili.
Inlawlawagna a saan nga agpangadua nga i-report kadakuada no adda dagiti maammoan maipanggep kadagiti pangta dagiti makakannigid a grupo.
Innayonna a manarimaan ti pannakapagbalin a moderno dagiti kagamitanda tapno ad-adda a kabaelanda a makalaban dagiti grupo a kontra iti gobierno.
