LAOAG CITY – Pormalen a naipaima ti dua a rescue boat iti Provincial Government of Ilocos Norte manipud iti Department of the Interior and Local Government.
Basar iti gobierno probinsial, indauloan ni Atty. Gerald Gallardo ti Department of the Interior and Local Government iti pannakaipaay ti dua a rescue boat iti Provincial Government of Ilocos Norte nga inbagian ti Gobernador.
Mainaig iti daytoy, naimatangan pay da Provincial Planning and Development Officer Engr. Pedro Agcaoili Jr., P/Lt.Col. Jephre Taccad, mangidadaulo ti Provincial Operation Management Unit iti Ilocos Norte Police Provincial Office ken Mr. Marcell Tabije, mangidadaulo ti Provincial Disaster Risk Reduction and Management Office.
Naammoan a ti insentibo a naipaay iti gobierno probinsial manipud iti pannakaipasa iti Seal of Good Local Governance idi 2023 ket isu ti nakaigatangan dagiti dua a rubber boat a dakdakkel ti makinana a kabaelanna ti napigsa nga ayus ti danum no adda ti sumangbay a bagyo ditoy probinsia.
Kabayatanna, dumanon iti walo nga indibidual ti mabalin aglugan iti rubber boat ngem nakadepende iti sasaaden ti panawen.
