Kinumpirmaran ni Police Captain Michael Permison, hepe ti PNP Currimao, a napataray dagiti biktima ti desgrasya iti Brgy. Piat Norte iti ili ti Currimao.
Binigbig ni Permison dagiti nagkalubbon iti motorsiklo a da Arnold Barola, driver ti motorsiklo kenni Ciari Galzote, agpada a residente iti Brgy. Maglaoi Norte iti nasao nga ili.
Segun kenni Permison, basar kadagiti nakakita iti insidente, ket napataray ti driver ti motorsiklo idi nakadanun iti kurba a paset ti kalsada ket naidungpar iti semento a poste iti nasao a lugar.
Inbatad na a dagus a naitaray iti ospital dagiti biktima ngem naideklara a dead on arrival ti driver idinto a natay met bayat a maag-agasan ni Galzote a nagsagaba iti nakana a sugat ken natukkol ti saka ken ima na.
Inbunannag ni Permison a naglugan dagiti biktima iti maysa a nangisit a Mio 125 ken immuna a napanda nakiinom iti Brgy Maglaoi, kalpasan na ket napan da iti maysa a convenience store iti Brgy San Simeon, ngem iti agsubli da ket isu iti pannakadesgrasya da.
Nupay kasta, ti laeng driver ti naduktalan a nakainom ti nasanger, basar kadagiti kakadua da idi rabii.
Innayon ni Permison nga awan met iti problema iti kalsada ken addaan iti silaw wenno street light.
Rumrumwar nga awanan da iti suot nga helmet ken naipurwak da iti nadesgrasya da.
