LAOAG CITY – Natiliw ti maysa a lalaki iti naiyuswat a drug buy-bust operations babaen kadagiti kameng ti Philippine National Police (PNP) iti airport road iti Barangay 48-A, Cabungaan ditoy ciudad ti Laoag.
Nabigbig ti subject ti operasyon a ni Emil John Ruiz, agtawen ti 23, baro ken residente iti Barangay 25 ditoy ciudad.
Kinemmeg a dagus dagiti otoridad ni Ruiz kalpasan a naglako iti pulis a nagpammarang a poseur-buyer ti maysa a sachet a naglaon ti maipagarop a napagango a marijuana nga agbalor ti 500 a pisos.
Malaksid iti daytoy, naala pay iti ikot ti suspek ti maysa pay a plastic sachet a maipagarop a naglaon met laeng ti bulong, tangkay ken bukel ti marijuana, a naikarga iti kaha ti sigarilyo, dua nga stick ti sigarilyo a maatap nga adda ti karga na a marijuana, 500 a pisos a buy-bust money, ken ti personal a kwarta ti ni Ruiz nga 416 a pisos.
Maibilang ni Ruiz nga street level individual ken Under Priority Target Drug Personality.
Naamoan a ti orihinal koma a transaksyon ket iti Barangay 45, Tanguid ditoy ciudad ngem nagbaliw agingga a nakadanun dagiti maseknan iti Barangay 48-A, Cabungaan ditoy ciudad ti Laoag.
Nagkedked metten ti suspek a nagpainterview iti Bombo Radyo Laoag.
