LAOAG CITY – Balligi ti pannakatiliw ti maysa a lalaki iti naiyuswat a drug buy-bust operation dagiti kameng ti Provincial Drug Enforcement Unit iti Barangay 2 ditoy ciudad ti Laoag.
Nabigbig daytoy a ni Dionie Acosta III y Gagarin, agtawen ti 45, naasawaan, maysa a tricycle driver ken residente iti Barangay Barit ditoy ciudad ti Laoag.
Nakagatang met ti police pusuer buyer ti maysa a sachet a naglaon ti maipagarop a shabu ken ditoyen a natiliw ni Acosta.
Nakumpiskar pay dagiti otoridad ti maysa pay a sachet ti maipagarop met laeng a shabu, ken buy bust money a sangaribo a pisos.
Naamoan a ni Acosta ket nakarwar iti pagbalodan idi 2018 gapo met laeng iti panaglabsing na iti RA 9165.
Inpetteng ni Acosta a saan na a kukua dagiti maipagarop nga iligal a droga ken nagbalbaliw isunan sipud nabalod iti napalpalabas a tawen.
Inlawlawag na a naarkila laeng isuna manipud iti Barangay 2 agingga iti likod ti National Food Authority (NFA) ken idi nakadanon ket adda ti maipagarop a nagpabigbig a maysa a pulis.
Kunana a ditoy metten a pinakpakleb da isuna ken sipud idi rimuar iti pagbalodan ket saanen a nagusar ti iligal a droga.
Kabayatanna, inbatad ti PNP a no Acosta ket maibilang nga high value individual ken adda iti listaan ti Drug Watchlist ti PNP Regional Office 1.
Malaksid iti daytoy, rumrumuar a ni Acosta ket karaman iti maysa a drug group nga agop-operar ditoy probinsya ken iti sabali pay a lugar.
Naamoan a ni Acosta ket natiliw babaen met laeng iti impormasyon dagiti ummunan a natiliw ken kalpasan ti naiyuswat a validation.
