LAOAG CITY – Nabirukan ti dua a short magazine ken innem a balbala ti paltog iti paset ti Sitio 3, Brgy. 48-A, Cabungaan ditoy Siudad ti Laoag.
Segun ken ni Pat. Roi Darren Luna, ti Imbestigador ti Philippine National Police ditoy Siudad ti Laoag, adda ti naawat ti opisinada a tawag manipod ken ni Sammy Dy y Tungpalan, agtawen ti 56, Chief Tanod ken residente iti nasao a Barangay ken maipanggep iti nakita a magazine ken balbala ti paltog.
Kuna na a dita a dagusda a nagturong iti lugar ken nakumpirmaran nga adda ti supot nga agmaris ti puraw a naglaon ti short magazines ken balbala.
Inlawlawagna basar iti inpakaammo ti Chief Tanod, bayat a magmagna iti Barangay Mini Park ket dita nga adda ti nariparna a supot a nakaipalaunan kadagiti nasao a ramit.
Kunana a nagasat nga awan met dagiti ubbing iti Barangay Mini Park a nagay-ayam kadayta a gundaway gapu ta amangan a nakaitunda daytoy ti desgrasya.
Mainiag iti daytoy, inpakaammo ni Luna a naipan dagiti bala ken magazine iti Ilocos Norte Provincial Forensic Unit para iti pannakaipadalan dagitoy iti Ballistic Examination.
