LAOAG CITY – Nagtalinaed nga isolated ti dua manipod iti tallo a sitio iti ili ti Adams gapu kadagiti perdisyon nga intunda ti bagyo Marce ken dagiti simmaruno pay a bagyo.
Daytoy ti kinumpirmaran ni Mr. Julius Cascayan, ti mangidadaulo iti Municipal Disaster Risk Reduction and Management Office iti ili ti Adams.
Segun ken ni Cascayan, nalukatanen ti pagnaan iti paset ti sitio Sinidangan ngem narigat latta ti magna nga agturong iti nadakamat a lugar gapu ta nalutlot, idinto nga iti sitio Cadisan ken Bucarot ket nagtalinaed nga isolated.
Kuna na a basar iti rekord ti Municipal Social Welfare and Development ket adda ti agarop 55 a pamilya nga agnanaed kadagiti nadakamat a lugar.
Inpakaammo na a dagiti mapan agikabil ti relief goods ket masapol a motorsiklo ti pagluganan da wenno magmagna dagitoy gapu iti kinarigat ti dalan nga agturong kadagiti nadakamat a sitio.
Mainaig iti daytoy, inrakurak ni Cascayan nga ar-aramiden amin ti gobierno lokal iti ili ti Adams ti kabaelan na para iti naan-anay a pannakatarimaan dagiti nadadael a kalsada babaen ti naan-anay a pannakikoordinar da iti Department of Public Works and Highways, karaman iti gobierno probinsyal ken iti opisina ni Congressman Sandro Marcos.
Innayon ni Cascayan nga iti laeng nabiit a naisubli ti linya ti kuryente ken komunikasyon, ngem idi laeng rabii ket nagpukaw manen ti suplay ti kuryente iti nadakamat a lugar gapu iti kaado dagiti naapektaran a poste.
Kabayatanna, inpakaammo ti Philippine National Police iti ili ti Adams nga adda ti inasistiran da a maysa a pamilya manipod iti Poblacion 1 iti naisayangkat a preemptive evacuation.
