LAOAG CITY – Inlawlawag ni Atty. Diosdado Araos iti National Bureau of Investigation (NBI) ditoy ciudad ti Laoag no kasano ti pannakatiliw da kadagiti dua a suspek ti panagrames a napasamak idi 1984.
Binigbig ni Araos dagiti dua a suspek nga isuda Alberto Bumanglag a taga Brgy. Balacad ditoy ciudad ti Laoag ken ni Ernesto Macalipis, iti Castro Avenue ditoy ciudad.
Segun kenni Araos, natiliw ni Bumanglag iti mismo a residensya na kalpasan ni 27 a tawen a panaglemlemmeng na sipud naglibas kabayatan ti trial idinto a ni Macalipis ket natiliw iti Barangay Pila ditoy met laeng ciudad kalpasan met ti 36 a tawen.
Kunana nga inarestar da dagiti dua a suspek babaen ti pannakakoordinar da kadagiti opisyal ti barangay kalpasan ti sumagmamano a bulan a naawat da ti impormasyon nga adda ditoy ciudad dagiti suspek.
Saan met a makumpirmaran ni Araos ti relasyon ni Macalipis ken ti kapitan ti Barangay Pila gapo ta saan da a nagimbestigar no diket nagimplementar da laeng ti inyetnag ti korte.
Nupay kasta, rumrumwar a ni Macalipis ket nagpaay kas helper idi ti barangay kapitan.
Mainaig iti daytoy, kuna ni Araos a ti insidente a napasamak idi 1984 a nakabiktimaan ti dua a babbai ket lima dagiti nagbalin a suspek.
Basar kenni Araos, kadagiti lima a suspek ket maysa ti na-acquit, dua ti nasentensyaan ngem ti maysa ket rumrumwar a pimmusayen bayat nga iserserbi na ti sentensya na.
Iti agdama ket adda iti kustudiyar ti NBI dagiti dua a suspek ken sumango da ti kaso a Forcible Abduction with Multiple Rape.
