LAOAG CITY – Simmukon iti National Bureau of Investigation (NBI) dagiti dua manipud iti lima a suspek a pimmatay kenni dati a Philippine Charity Sweepstakes Office (PCSO) board secretary Wesley Barayuga.
Personal a simmuko ti naikkat a dati a pulis a ni Nelson Mariano iti NBI Organized Transnational Crime Division idinto a ni Santie Mendoza ket simmuko met iti NBI Iloilo Office.
Segun iti NBI, napateg ti testimoniya dagiti dua gapo taa isuda ti nagserbi a middlemen nga adda ti pakainaigan na a direkta iti utek ti krimen.
Iti agdama ket iggemen ti NBI head office dagiti dua kabayatan a maiyur-uray ti commitment order ti korte.
Maipalagip a nangiparuk-aten ti warrant of arrest kontra kenni dati a PCSO general manager ken retired police colonel Royina Garma, dati a National Police Commission commissioner Edilberto Leonardo ken police a ni Jeremy Causapin gapo iti pannakatay ni Barayuga idi 2020.
Nakikoordenar metten ti NBI iti International Police Organization wenno interpol tapno mabirukan ni Garma.
Maipalagip nga idi Setyembre 7 ket nagturong idiay Malaysia ni Garma tapno makasango dagiti sumagmamano nga opisyal ti International Criminal Court gapo ta nakasagana a mangipaay ti testimonya kontra kenni dati a Presidente Rodrigo Duterte.
