LAOAG CITY – Naserrek dagiti dua a tiangge a nakapuesto iti Madongan Dam iti Brgy. San Marcelino iti ili ti Dingras.
Segun ken ni Ms. Daisy Balucas, maysa kadagiti akinkukua kadagiti naserrek a tiangge, adda ti walo nga indibidual a naglugan ti forward truck nga aglaklako ti sako a nagkiddaw kenkuana nga umutang ti pang-merienda kas ti softdrinks ken snacks pakairamanan ti sigarilio.
Inbatadna a nagkiddaw pay dagiti nasao nga indibidual nga umyanda pay laeng iti cottage-da banag a pinatgan met ti agtagikua gapu ta saan met daytoy ti umuna a gundaway a mapan dagitoy iti puestoda.
Nupay kasta, inpalgakna nga iti kabigatanna ket nakigtot dagiti padana nga adda ti puestoda a naserrek metten ti tianggeda ken awanen dagiti nadakamat nga indibidual.
Inlawlawagna a napukaw dagiti nagduduma a klase ti grocery items nga ilaklakoda iti tianggeda.
Gapu iti daytoy, kunana a dagusna nga in-report daytoy a napasamak iti Philippine National Police iti ili ti Dingras no sadino ket ditoy a naarestar dagiti maseknan nga indibidual iti Brgy. Callusa iti ili ti Piddig.
Mainaig iti daytoy, inpakaammona a 15 a ribu a pisos koma ti bayadan dagiti nasao nga indibidual ngem gapu ta nagpakaasi dagitoy kadakuada ket napagbalin laeng a 10 a ribu a pisos kas multa ken bayad dagiti innalada a grocery items.
Innayonna a nawayawayaan met laeng dagitoy kalpasan a dimmawatda ti panagpadispensar iti inaramidda kadakuada.
Kabayatanna, naammoan a dagiti maseknan nga aglaklako ti sako a nakalugan ti forward truck ket manipud iti probinsia ti Cagayan.
