LAOAG CITY – Dua a tricycle drivers ditoy siudad ti Laoag ti napagmulta gapu iti overloading ken overcharging wenno nalabes a panagsingir ti plete kadagiti pasahero.
Segun ken ni PSMsgt. Eric Bumagat, hepe ti PNP-Traffic Division ditoy siudad ti Laoag, mismo a nagkamang iti opisina da ti dua nga estudyante tapno maireport ti sobra a singir iti plete dagiti tricycle drivers.
Inpakaammo na a basar iti palawag dagiti estudyante, imbes a minimum fare ti bayadan dagitoy ket sag-20 a pisos ti nasingir a plete iti tunggal maysa iti laksid nga ado da a naglugan iti tricycle.
Immuna iti daytoy, inpetteng ni Mr. John Paul Nicolas, maysa kadagiti maseknan a tricyle drivers a ti dati pay laeng a 20 a pisos ti ammo na a singir kadagiti pasahero gapu ta awan pay ti naipakaammo kadakuada a panagsubli ti dati nga 11 pesos a plete.
Inbunannag ni Nicolas a gapu iti nalabsing na ket napagmulta iti 150 a pisos.
Kiniddaw met daytoy iti konseho ditoy siudad ti Laoag ti pannakaiparuk-at ti baro a fare guide tapno saan a maulaw dagiti traysikelan ken masapol a maikonsiderar ti nangin a presyo ti gasolina.
