LAOAG CITY – Nagballigi dagiti kameng ti Philippine National Police a nangarestar iti dua nga indibidual a maibilang kas wanted person iti nagsina nga operasyon ditoy probinsya.
Immuna a naarestar ti maysa a wanted person iti ili ti Banna a nabigbig a ni Mr. Adriano Taburada, agtawen ti 61, mannalon ken residente iti Barangay 8, Bumitog iti nadakamat nga ili.
Naarestar ni Taburada babaen iti bileg ti warrant of arrest nga inparuk-at ni Hon. Felix Salvador, ti presiding judge iti Regional Trial Court Branch 17 iti ciudad ti Batac gapu iti kaso na nga homicide.
Nairekomendar ti piyansa ti akusado nga 40 ribo a pisos para iti temporaryo a pannakawaya-waya na.
Kabayatanna, naarestar met iti Barangay 1 ditoy ciudad ti Laoag ti maysa pay a wanted person nga agtawen ti 31 a ni alyas “LA”, a residente iti Barangay 59-A, Dibua South ditoy ciudad.
Ti nasao nga akusado ket sumangsango iti kaso a Reckless Imprudence Resulting in Homicide.
Narekomendaran met ti akusado ti 9,235 a pisos a piyansa na para iti temporaryo a pannakawaya-waya na.
