LAOAG CITY – Kinumpirmaran ni Police Senior Master Sergeant Noel Gamit, ti Chief Investigator ti PNP Pinili iti pannakatiliw dagiti dua a lallaki a wanted person iti nagsina nga operasion iti ili ti Pinili
Segun kenni Gamit, naarestar ti agtawen ti 21 ken residente ti Brgy. Darat iti nasao nga ili babaen ti inparuk-at ni Honorable Maribel Mariano-Arriola, Assisting Judge RTC ti Branch 17 iti Siudad ti Batac a Warrant of Arrest gapu iti panagsalungasing na iti R.A. 9995 wenno Anti-Photo and Video Voyeurism.
Kunana a nagbibinnuligan daytoy ti Joint Tracker Team ti Pinili Municipal Police Station iti panangidaulo ni Police Lieutenant Reycar Almazan, ti Chief of Police ti PNP Pinili pakairamanan ti Badoc ken Currimao Municipal Police Station.
Inbatad na a nairekomendar iti suspek ti 42,000 para iti temporario a pannakawayawayana.
Kabayatanna, kuna ni Gamit a naarestar met ti agtawen ti 28, naasawaan, maysa a Security Guard ken tubo ti Brgy. Upon, iti nasao met laeng nga ili ngem agdama nga agnanaed iti 13th Avenue, Brgy. Socorro, Quezon City babaen iti inparuk-at ni Honorable Francisco R.D. Quilala, Presiding Judge RTC Branch 17 iti Siudad ti Batac a Warrant of Arrest gapu iti panagsalungasing na iti Bigamy.
Nairekomendar met iti suspek ti 24,000 para iti temporario a pannakawayawaya na.
Innayon na nga adda iti kustodyar ti PNP Currimao ti suspek iti Anti-Photo and Video Voyeurism idinto a nagtalinaed pay laeng iti PNP Pinili ti suspek iti Bigamy gapu ta maiyur-uray pay laeng dagiti dokumento a maipila kontra iti daytoy.
Naammoan a manarimaan ti kontruksion ti pagbaludan ti PNP Pinili rason a nakikoordinar da pay laeng kadagiti kabangibang a Municipal Police Station tapno ditoy a temporario a maikabil dagiti balud.
